Արծվանիկի պոչամբարից էլ մեծ պոչամբար այս փոքր երկրի տարածքում անթույլատրելի է. Զարուհի Փոստանջյան
«Եթե պետությունը իր գերակա շահն է համարում հանքարդյունաբերությունը, ապա նախ և առաջ պետք է մերժվի քաղաքական այդ ծրագիրը, քանի որ Թեղուտի հարցը փոքր բնապահպանական, միայն ակտիվիստներին հուզող խնդիր չէ, սա լուրջ քաղաքական գործընթաց է, որի մեջ պետք է ներգրավված լինեն հասարակության բոլոր տարրերը, որոնց վերապահված է այս պայքարը դեպի հաղթանակ տանելը, քանի որ մի խմբի կողմից այս պայքարը չի կարող ունենալ հաջողություն: Հարցը պետք է լուծվի քաղաքական տրամադրության ներքո և պետք է ձևավորվի քաղաքական այն մթնոլորտը, որը կմերժի նախկին քաղաքականությունը»,- ասաց Զարուհի Փոստանջյանը econews-ի հետ զրույցում:
Թեղուտի խնդրի լուծումը Զ. Փոստանջյանը տեսնում է միայն Կառավարության ընդունած որոշման անվավեր ճանաչման միջոցով: «Հանքը շահագործելու մասին որոշումն ընդունվել է մի շարք միջազգային նորմերի կոպիտ խախտմամբ, այդ մասին կա Օրհուսի համապատասխանելիության որոշում, և ՀՀ Կառավարությունը պետք է հարգի այդ որոշումը: Եվ այն բոլոր որոշումները, որոնք ընդունվել են կառավարության կողմից, պետք է ճանաչվեն անվավեր»,- ասում է Զարուհի Փոստանջյանը:
Econews-ի հարցին` եթե այնուամենայնիվ հանքը մյուս տարի արդեն սկսվի շահագործվել, որո՞նք են լինելու ձեր քայլերը, Զ. Փոստանջյանը նշեց, որ պետք է արվի ամեն ինչ, որպեսզի թույլ չտրվի այդ ապօրինության կյանքի կոչումը:
Ըստ Զ. Փոստանջյանի` բոլոր բնապահպանական խնդիրներն իրենց ուշադրության կենտրոնում են, սակայն հաշվի առնելով Թեղուտի պղնձամոլիբդենային հանքի շահագործման պատճառով առաջանալիք պոչամբարի մեծությունը, կարելի է նշել, որ ներկա պահին առաջնային է հենց Թեղուտի խնդիրը: «Մենք ունենք հսկայական գործող պոչամբար հարավում, խոսքը Արծվանիկի պոչամբարի մասին է, ևս մեկ նման փոչամբար այս փոքր երկրի տարածքում անթույլատրելի է»,- ասաց Զարուհի Փոստանջյանը:
econews.am
